Ang salitang ‘teolohiya’ o
‘theology’ ay nagmula sa dalawang salitang Griyego na pinagsama na ang ibig
sabihin ay ‘pagaaral tungkol sa Diyos.’ Ang Kristiyanong teolohiya ay isang
simpleng pagtatangka na unawain ang Diyos kung paano Siya ipinakilala sa
Bibliya. Walang teolohiya ang kumpletong makapagpapaliwanag sa Diyos at sa
Kanyang mga kaparaanan dahil ang Diyos ay walang hanggan at sobrang mataas ang
karunungan ng higit sa atin. Kaya nga anumang pagtatangka na ilarawan Siya ay
magiging kapos pa rin (Roma 11:33-36). Gayunman, nais ng Diyos na makilala
natin Siya hanggang sa abot ng ating makakaya, at ang teolohiya ang sining at
siyensya ng pagaaral sa lahat ng ating kayang maunawaan tungkol sa Diyos sa
isang organisadong kaparaanan. May mga tao na iniiwasan ang pagaaral ng
teolohiya dahil naniniwala sila na ito diumano ang nagiging sanhi ng
pagkakabahabahagi sa halip ng pagkakaisa. Ngunit kung mauunawaan ng tama, ang
teolohiya ay nagiging daan sa tunay na pagkakaisa. Ang isang tama at Biblikal
na teolohiya ay mabuting bagay; ito ang pagtuturo ng Salita ng Diyos (2 Timoteo
3:16-17).
Kaya nga ang pagaaral ng
teolohiya ay walang iba kundi ang paghuhukay sa Salita ng Diyos upang
matuklasan ang kanyang pagpapakilala sa Kanyang sarili. Kung gagawin natin ito,
makikilala natin Siya bilang manlilikha ng lahat ng mga bagay, ang umaalalay sa
lahat ng mga bagay at ang hukom ng lahat ng mga bagay. Siya ang Aplha at Omega,
ang pasimula at wakas ng lahat ng mga bagay. Nang tanungin ni Moises kung sino
ang nagsusugo sa Kanya sa Faraon, sinabi ng Diyos "AKO AY AKO NGA"
(Exodo 3:14). Ang salitang AKO NGA ay nagpapahiwatig ng Kanyang personalidad.
May pangalan ang Diyos gaya ng pagbibigay Niya ng pangalan sa iba. Ang pangalang
AKO NGA ay sumisimbolo sa isang personalidad na malaya, puno ng layunin at
sapat sa Kanyang sarili. Ang Diyos ay hindi isang makalangit na pwersa o isang
pangkalawakang enerhiya. Siya ang makapangyarihan sa lahat, ang nabubuhay sa
sarili, ang nagtatakda sa lahat ng bagay na may karunungan at kalooban - ang
personal na Diyos na ipinakilala ang Kanyang sarili sa sangkatauhan sa
pamamagitan ng Kanyang Salita at sa pamamagitan ng Kanyang Anak na si Hesu
Kristo.
Ang pagaaral ng teolohiya ay ang
pagkilala sa Diyos upang maluwalhati at maparangalan Siya sa pamamagitan ng
ating pag-ibig at pagsunod. Pansinin ang progreso: kailangan natin muna Siyang
makilala bago natin siya maibig at kailangan natin Siyang ibigin muna bago tayo
magkaroon ng pagnanasang sumunod. Bilang resulta, ang ating buhay ay
mapagyayaman sa paraang hindi kayang sukatin sa pamamagitan ng kaaliwan at
pag-asa na ipinagkakaloob Niya sa mga kumikilala, umiibig at sumusunod sa
Kanya. Ang mahinang teolohiya ay balatkayo lamang at guguluhin lamang ang ating
buhay ng isang maling pagkaunawa sa Diyos sa halip na magkaroon tayo ng
kaaliwan at pag-asa. Ang pagkakilala sa Diyos ay napakahalaga. Magiging malupit
tayo sa ating mga sarili kung tatangkain nating mamuhay sa mundong ito ng
walang pagkakilala sa Diyos. Ang mundo ay isang lugar na puno ng kapighatian at
ang buhay dito ay puno ng kabiguan at kahirapan. Tanggihan mo ang teolohiya at
hahatulan mo ang iyong sarili sa pagkakaroon ng buhay na walang kabuluhan at
walang direksyon. Kung walang teolohiya, sasayangin natin ang ating buhay sa
mundo at tiyak na mapapahamak ang ating kaluluwa.
Ang bawat Kristiyano ay dapat na
magnasang mainam ng teolohiya at magkaroon ng personal na pagaaral tungkol sa
Diyos upang makilala, mahalin at sundin Siya na ating makakasama sa kagalakan
sa walang hanggan.
No comments:
Post a Comment