Ang sinasabi ng Biblia patungkol sa pag-aasawa.

Ang paglikha ng pag-aasawa ay nakatala sa Genesis 2: 23-24: "At sinabi ng lalake, Ito nga'y buto ng aking mga buto at laman ng aking lamang: siya'y tatawaging Babae, sapagka't sa Lalake siya kinuha. Kaya't iiwan ng lalake ang kaniyang ama at ang kaniyang ina, at makikipisan sa kaniyang asawa; at sila'y magiging isang laman." Nilikha ng Dios ang lalake at nilikha ang babae upang maging kaganapan niya. Ang pag-aasawa ay ang "sagot" ng Dios sa katotohanan na "Hindi mabuti na ang lalake ay mag-isa" (Genesis 2:18)

Ang salitang "katulong" na ginamit sa paglalarawan kay Eva sa Genesis 2:20 ay nangangahulugan - paligiran, ipagtanggol, tulungan o saklolohan." Si Eva ay nilikha upang maka-agapay ni Adam bilang kanyang "kahati," maging kanyang katulong at katuwang. Kapag ang isang babae at lalake ay nagpakasal, sila ay nagiging "isang laman." Ang kaisahang ito ay naipapahayag ng lubos sa pagkakaisa ng katawan sa sekswal na pagtatalik. Ang Bagong Tipan ay nagdagdag ng paalala patungkol sa kaisahang ito. "Kaya nga hindi na sila dalawa, kundi isang laman. Ang pinagsama ng Dios, ay huwag papaghiwalayin ng tao." (Mateo 19:6)

Ang daan tungo sa Kaligtasan

Si Hesu Kristo ang tanging “daan” tungo sa kaligtasan! “Sapagka't sa biyaya kayo'y nangaligtas sa pamamagitan ng pananampalataya; at ito'y hindi sa inyong sarili, ito'y kaloob ng Diyos; Hindi sa pamamagitan ng mga gawa, upang ang sinoman ay huwag magmapuri” (Efeso 2.8-9). “..datapuwa't ang kaloob na walang bayad ng Diyos ay buhay na walang hanggan kay Cristo Jesus na Panginoon natin” (Roma 6.23).

Ano ang pinagdadaanan mo ngayon sa buhay? Ikaw ba ay dumadaan sa pagkakasala, kalituhan, kaguluhan, kahirapan, kalungkutan, sakit, kapaguran, galit at kawalan ng pag-ibig o kawalang kabuluhan? Sadyang mahirap ang buhay! Si Satanas at ang kasalanan ang dahilan! Napapagod ka na ba sa pakikipag-laban sa tao at sa iyong mga problema? Si Hesus ang daan! Iniibig ka Niya! Si Hesus ang tanging tao at Panginoon na nararapat sundin! Muli ngang nagsalita sa kanila si Hesus, na sinasabi, “Ako ang ilaw ng sanlibutan; ang sumusunod sa akin ay hindi lalakad sa kadiliman, kundi magkakaroon ng ilaw ng kabuhayan” (Juan 8.12).

Ang Buhay na Walang Hanggan.

May napakaliwanag na sagot ang Biblia patungkol sa pagkakaroon ng buhay na walang hanggan. Una, kailangan nating kilalanin at aminin na nagkasala tayo sa Diyos. “Sapagkat ang lahat ay nagkasala at walang sinumang karapat-dapat sa paningin ng Diyos” (Roma 3:23). Lahat tayo ay nakagawa ng mga bagay na hindi mabuti sa paningin ng Diyos, kaya nararapat lamang na parusahan Niya tayo. Dahil ang lahat ng ating mga kasalanan ay paglaban sa walang hanggang Diyos, ang kanyang kaparusahan sa mga nagkasala ay walang hanggan din naman. “Sapagkat kamatayan ang kabayaran ng kasalanan, ngunit ang kaloob ng Diyos ay buhay na walang hanggan sa pamamagitan ni Cristo Hesus na ating Panginoon” (Roma 6:23).

Si Hesu Kristo na walang anumang nagawang kasalanan (1 Peter 2:22), at walang hanggang Anak ng Diyos ay nagkatawang tao (Juan 1:1, 14) at namatay upang bayaran ang kaparusahang nararapat para sa ating mga kasalanan. Ayon sa Roma 5:8, “Ipinakita ng Diyos ang kanyang pag-ibig sa atin nang mamatay si Cristo para sa atin noong mga makasalanan pa tayo.” Namatay si Hesu Kristo sa krus (Juan19:31-42) upang akuin ang kaparusahang nararapat sa atin (2 Corinto 5:21). Pagkatapos ng tatlong araw, Siya'y nabuhay na mag-uli (1 Corinto 15:1-4) bilang katibayan na natalo na niya ang kasalanan at kamatayan. “Dahil sa laki ng habag niya sa atin, tayo'y isinilang sa isang panibagong buhay sa pamamagitan ng muling pagkabuhay ni Hesu Kristo. Ang bagong buhay na iyon ay nagbigay sa atin ng malaking pag-asa” (1 Pedro 1:3).

Ako ngayon ay sumampalataya na kay Hesus.

Binabati kita! Gumawa ka ng isang pagpapasya na babago sa iyong buhay. Maaaring mayroon kang mga katanungan kung paano ka magsisimula sa iyong pamumuhay bilang isang Kristiyano. Narito ang limang panuntunan mula sa Salita ng Diyos upang iyong magsilbing patnubay. 

1. Tiyakin mo kung nauunawaan mo ang tungkol sa kaligtasan.

Sinasabi sa atin sa 1 Juan 5:13, “Isinusulat ko ito sa inyo, kayong nananalig sa Anak ng Diyos, para malaman ninyo na may buhay kayo na walang hanggan.” Nais ng Diyos na maunawaan natin ang ating kaligtasan. Nais niyang lubos ang ating paniniwala na nakatitiyak tayo na tayo ay ligtas na. Balikan natin ang mga mahalagang bagay tungkol sa kaligtasan:

a. Lahat tayo ay nagkasala. Lahat ay nakagawa ng mga bagay na hindi nais ng Diyos (Roma 3:23).

b. Dahil sa ating mga kasalanan, nararapat lamang na parusahan tayo ng walang hanggang pagkahiwalay sa Diyos (Roma 6:23).

k. Namatay si Hesus sa krus para sa atin upang bayaran ang ating mga kasalanan (Roma 5:8; 2 Corinto 5:21). Siya ang nagtiis ng parusa na nararapat sa atin. At ang kanyang muling pagkabuhay ang ebidensya na sapat ang kanyang bayad para sa ating mga kasalanan.

d. Pinatatawad ng Diyos at inililigtas ang lahat ng sumampalataya kay Hesus at nagtitiwala sa kanyang kamatayan bilang pambayad sa kanilang mga kasalanan (Juan 3:16; Roma 5:1; Roma 8:1).

Ang Rapture o Pagdagit ng Iglesia.

Ang salitang ‘rapture’ o pagdagit sa mga mananampalataya ay hindi makikita sa Bibliya, gayunman ang konsepto ng ‘rapture’ ay malinaw na itinuturo ng Bibliya. Ang ‘rapture’ o pagdagit sa Iglesia ay isang pangyayari kung kailan kukunin ng Diyos ang lahat ng mga mananampalataya sa lahat ng dako ng mundo upang bigyang daan ang Kanyang matuwid na paghatol na ibubuhos sa sangkatauhan sa panahon ng pitong (7) taon ng paghihirap. Inilalarawan ang ‘rapture’ sa aklat ng 1 Tesalonica 4:13-18 at 1 Corinto 15:50-54. Inilalahad sa 1 Tesalonica 4: 13-18 na bubuhaying mag-uli ng Diyos ang lahat na mga mananampalataya na nangamatay na at bibigyan sila ng maluwalhating katawan at ang mga naabutang buhay naman ay hindi na daranas ng kamatayan at bibigyan din naman ng maluwalhating katawan at sila’y magtatagpo sa papawirin. "Sa araw na yaon, kasabay ng malakas na utos ng tinig ng arkanghel at ng tunog ng trumpeta ng Diyos, bababa ang Panginoon mula sa langit. Bubuhayin muna ang mga namatay na nananalig kay Kristo. Pagkatapos, tayong mga buhay pa ay titipunin niya sa ulap at isasama sa mga binuhay upang salubungin sa papawirin ang Panginoon. Sa gayo'y makakapiling niya tayo magpakailanman" (1 Tesalonica 4:16-17).

Konsepto ng pagiging Ama ng Diyos

“Masdan ninyo kung gaanong pagibig ang ipinagkaloob sa atin ng Ama, upang tayo'y mangatawag na mga anak ng Dios; at tayo'y gayon nga. Dahil dito'y hindi tayo nakikilala ng sanglibutan, sapagka't siya'y hindi nakilala nito” (1 Juan 3:1). Ang talatang ito ay naguumpisa sa isang utos: “Masdan.” Nais ni Juan na obserbahan natin ang manipestasyon ng pag-ibig sa atin ng Diyos bilang isang Ama. Ipinakilala ni Juan ang paksa ng pag-ibig ng Diyos sa nakaraang kabanata (1 Juan 2:5, 15), at pagkatapos na ipaliwanag ito ng maiksi sa ikatlong kabanata, ipinaliwanag niya ito ng buo sa ikaapat na kabanata. Layunin ni Juan na ilarawan kung anong uri ng pag-ibig na mayroon ang Diyos para sa Kanyang mga anak, “kung gaanong pagibig.” Ang salitang Griyego na isinalin sa salitang “kung gaanong pagibig” ay matatagpuan ng anim na beses lamang sa Bagong Tipan at laging nagpapahiwatig ng pagkamangha at paghanga. 

Ang Banal na Espiritu

Maraming mali ang pagkakilala sa Banal na Espiritu. Pinaniniwalaan ng ilan na ang Banal na Espiritu ay isa lamang misteryosong kapangyarihan. Ang iba naman ay naniniwalang ang Banal na Espiritu ay personal na kapangyarihan ng Diyos na ibinigay Niya sa mga tagasunod ni Kristo. Ano ba ang sinasabi ng Bibliya tungkol sa Banal na Espiritu? Sinasabi ng Bibliya na ang Banal na Espiritu ay Diyos. Sinasabi din ng Bibliya na ang Banal na Espiritu ay isang persona na may pag-iisip, damdamin at kalooban.

Ang katotohanang ang Banal na Espiritu ay Diyos ay malinaw na makikita sa maraming mga talata ng Bibliya. Ilan sa mga ito ay ang aklat ng Mga Gawa 5:3-4. Sa talatang ito, sinaway ni Pedro si Ananias at tinanong kung bakit siya nagsinungaling sa Banal na Espiritu at sinabi niya rito “Hindi ka nagsinungaling sa tao kundi sa Diyos.” Ito'y isang malinaw na katuruan na ang pagsisinungaling sa Banal na Espiritu ay pagsisinungaling sa Diyos. Malalaman din natin na ang Banal na Espiritu ay Diyos dahil mayroon din Siyang mga katangian na taglay din ng Diyos, kagaya halimbawa ng katotohanang ang Banal na Espiritu ay nasa lahat ng lugar sa lahat ng panahon at ito ay makikita sa Awit 139:7-8, “Saan man ako magpupunta, upang ako'y makatakas? Sa Banal Mong Espiritu’y hindi ako makaiwas. Kung langit ang puntahan ko, pihong Ikaw ay naroroon, sa sheol ay naroon Ka kung do’n ako manganganlong.” Sa 1 Corinto 2:10, makikita rin natin na alam ng Banal na Espiritu ang lahat ng mga bagay. “Subalit ito'y inihayag ng Diyos sa atin sa pamamagitan ng Espiritu. Nasasaliksik ng Espiritu ang lahat ng bagay, maging ang pinakamalalim na panukala ng Diyos. Walang nakakaalam sa iniisip ng tao maliban sa kanyang sariling espiritu. Gayon din naman, walang nakakaalam sa mga iniisip ng Diyos kundi ang Espiritu ng Diyos.”

Nakikipag-usap ang Diyos sa panahon natin ngayon.

Nasusulat sa Bibliya na nakipag-usap ang Diyos sa mga tao ng maraming beses (Exodo 3:14; Joshue 1:1; Hukom 6:18; 1 Samuel 3:11; 2 Samuel 2:1; Job 40:1; Isaias 7:3; Jeremias 1:7; Gawa 8:26; 9:15, ito'y ilang halimbawa lamang). Sa daan-daang beses na pakikipag usap ng Diyos sa tao sa iba't-ibang kaparaanan na itinala sa Bibliya, dapat nating tandaan na naganap ang mga pakikipagusap na ito ng Diyos sa tao sa loob ng apat na libong taon sa kasaysayan. Ang malinaw na pagsasalita ng Diyos ay isang natatanging karanasan ngunit hindi ito kinakailangang mangyari sa mga Kristiyano. 

Kahit na ang mga naitalang pangyayari sa Bibliya kung saan nagsasalita ang Diyos ay hindi maliwanag kung sa pamamagitan ba ng tinig buhat sa labas o sa loob, o impresyon ng kaisipan.

Totoo namang nangungusap pa ang Diyos sa mga tao sa kasalukuyan. Una, Nakikipag-usap ang Diyos sa atin sa pamamagitan ng Kanyang salita, ang Bibliya (1 Timoteo 3: 16-17). Sinasabi rin sa aklat ng Isaias 55: 11, “Ganyan din ang Aking mga salita, magaganap nito ang lahat Kong nasa.” Nakasulat sa Bibliya ang mga Salita ng Diyos at ang lahat ng kinakailangan nating malaman upang tayo'y maligtas at makapamuhay ng ayon sa Kanyang kalooban. Sinasabi din sa 2 Pedro 1:3-4, “Tinanggap natin sa pamamagitan ng kapangyarihan ng Diyos ang lahat ng bagay na magtuturo sa atin upang tayo'y mamuhay na maka-Diyos. Ito'y dahil sa ating pagkakilala kay Jesus, na siya ring tumawag sa atin upang bahaginan tayo ng kanyang karangalan at kabutihan. Sa paraang ito ay binigyan niya tayo ng mga dakila at napakahalagang pangako upang makaiwas tayo sa nakakasirang pagnanasa sa sanlibutang ito at upang makabahagi tayo sa kanyang likas bilang Diyos.”

Si Hesu Kristo

Hindi gaya ng katanungang, “Mayroon bang Diyos,?” iilang tao lamang ang nagtatanong ng “Sino si Hesu Kristo?” dahil halos lahat ay kumikilala na si Hesus ay totoong taong nabuhay at nanirahan sa bansang Israel dalawang libong (2,000) taon na ang nakararaan. Naguumpisa ang pagtatalo-talo kapag ang talakayan ay may kinalaman sa uri ng pagkatao ni Hesus. Halos lahat ng mga pangunahing relihiyon ay nagtuturo na si Hesus ay isang propeta, mahusay na mangangaral, o taong makadiyos. Subalit ang Banal na Kasulatan ay nagpapahayag na si Hesu Kristo ay higit pa sa isang Propeta, mabuting Guro, o taong makadiyos.

Sa kanyang aklat na “Mere Christianity,” sinulat ni C.S. Lewis ang ganito: “Sinisikap kong pigilan ang sinuman sa pagsasabi ng ganitong kahangalan tungkol kay Hesu Kristo: 'Handa kong tanggapin na si Hesus ay isang dakila at marangal na mangangaral, ngunit hindi ko tinatanggap ang Kanyang pagpapakilala sa sarili bilang Diyos.' Iyan ang isang bagay na hindi nararapat sabihin. Ang isang pangkaraniwan lamang na tao na nag-aangkin ng gaya ng mga ipinahayag ni Hesus ay hindi kailanman maaaring maging Dakilang Guro. Maaaring nasisiraan Siya ng bait - katulad ng pagsasabi na Siya'y isang malasadong itlog - kundi man Siya'y isang diyablo ng impiyerno. Kailangan mong mamili. Maaaring ang taong ito ay ang Anak ng Diyos, o kaya nama'y isang baliw o mas higit pa sa baliw. Sabihin mo na isa Siyang hangal, duraan mo Siya at patayin o magpatirapa ka sa Kanyang paanan at tawagin siyang Panginoon at Diyos. Ngunit huwag nating palampasin ang walang kabuluhang pagturing kay Hesus bilang isang dakilang mangangaral lamang. Ang pagpili kung paano natin kikilalanin si Hesus ayon sa ating pananaw ay isang bagay na hindi Niya pinahintulutan.”

Ang Bibliya

Ang salitang “Bibliya” ay nanggaling sa salitang Latin at Griego na nangangahulugang “Libro,” isang angkop na pangalan dahil ang Bibliya ay ang Aklat para sa lahat ng tao sa lahat ng panahon. Ito ay Aklat na walang katulad at natatangi sa lahat ng Aklat. 

Ang Biblita ay binubuo ng 66 na mga aklat. Kasama sa mga ito ay mga aklat ng Kautusan gaya ng Levitico at Deuteronomio; mga Aklat kasaysayan gaya ng Ezra at Mga Gawa; mga aklat tulaan gaya ng Mga Awit at Mangangaral; Mga aklat ng mga hula gaya ng Isaias at Pahayag; mga talambuhay gaya ng Mateo at Juan at mga personal na sulat gaya ng Tito at Hebreo. 

Ang mga May Akda

May humigit kumulang apatnapung taong manunulat ang nagkontribusyon sa Bibliya na isinulat sa loob ng mahigit na 1500 taon. Kabilang sa mga sumulat ng mga aklat nito ay mga hari, mangingisda, pastor, saserdote, opisyal ng gobyerno, abogado at manggagamot. Mula sa mga pagkakaibang ito nabuo ang isang hindi kapanipaniwalang pagkakaisa, na may iisang tema na bumubuo sa mga aklat mula umpisa hanggang wakas.

Ang pagkakaisa ng mga aklat ng Bibliya ay sa kadahilanang ang talagang may akda nito ay ang Diyos mismo. Ang Bibliya ay “hiningahan ng Diyos” (2 Timoteo 3:16). Ang mga tao na ginamit upang sumulat ng mga aklat ay pinangasiwaan ng Diyos at ipinasulat kung ano lamang ang gusto Niyang maisulat at ang resulta ay ang perpekto, banal at walang kamaliang Salita ng Diyos (Awit 12:6; 2 Pedro 1:21).