Makipagkasundo ka na lang.

Lukas 14:31-32  O aling hari, na kung sasalubong sa pakikidigma sa ibang hari, ay hindi muna uupo at sasangguni kung makahaharap siya na may sangpung libo sa dumarating na laban sa kaniya na may dalawangpung libo? O kung hindi, samantalang malayo pa ang isa, ay magsusugo siya ng isang sugo, at hihilingin ang mga kailangan sa pagkakasundo. 

Hati ang opinyon ng mamamayang Pilipino tungkol sa ginawang pakikipag-ayos ni Pangulong Rodrigo Duterte sa bansang China tungkol sa sigalot doon sa pinag-aagawang mga mumunting isla ng West Philippine Sea (China Sea). Bagama’t nanalo ang Pilipinas sa inihaing arbitration case sa UNCLOS laban sa China patuloy pa ring nagmamatigas ang bansang ito na kanila nga daw ang lahat ng mga islang nasasakop ng buong China Sea. Palibhasa makapangyarihan ang bansang ito hindi sila natinag sa lumabas na desisyon ng Arbitral Tribunal ng UNCLOS na pumapabor sa Pilipinas. Patuloy pa ring isinagawa ang kanilang mga aktibidades sa mga nasasakop nating mga isla hanggang sa natapos ito.

Ilang ulit nang naipahayag ng Pangulong Duterte na walang kakayanan ang Pilipinas na humarap sa pakikipagdigma sa higanting bansa na ito. Batid nating lahat kung gaano sila kalakas sa militarya at ekonomiya. Mauuwi lamang sa kahihiyan at katatawanan kung ang option ay pakikipagdigma sa kanila. Sa totoo lang wala naman talaga tayong kapana-panalo dito. Salamat sa Diyos sa ibinigay na wisdom sa ating Pangulo ang makipag-ayos na lamang sa China dahil ito ang nararapat at gusto ng Diyos.

Resulta, nanumbalik ang mabuting relasyon ng dalawang bansa, naiwasan ang kahihiyan sa magiging resulta ng digmaan at naibigay ang mga kailangan sa pagkakasundo. Tulad ng suportang pinansyal pang-ekonomeya at inprastruktura para sa Pilipinas at pananatili ng kapayapaan sa West Philippine sea na naka-ayon sa binalangkas na Code of Conduct kasama na ang iba pang mga bansa ng Asean. O! kay inam na mabuhay ng may kapayapaan at walang digmaan. Kung tutuusin mas mahal ang halaga ng rehabilitasyon pagkatapos ng digmaan kaysa  magagastos ng isang bansa sa pakikipagdigma!

Tulad ni Hesus na isang makapangyarihang Hari ng mga hari. Anu’t patuloy na nakikipagtunggali ang tao sa Kanya? Gamitin man natin ang lahat ng ating lakas, talino at kayaman hindi tayo mananalo laban sa Kanya sa araw ng Kanyang pagbabalik upang tayo’y hatulan. Mabuti pang makipagkasundo ka na lamang sa Kanya habang may panahon pa, bago maging huli ang lahat.

May mga nakalaang dakilang pangako ng pakikipagkasundo ang inihanda si Hesus para sa atin –ang buhay na walang hangan. Juan 3:16 “Sapagka't gayon na lamang ang pagsinta ng Dios sa sanglibutan, na ibinigay niya ang kaniyang bugtong na Anak, upang ang sinomang sa kaniya'y sumampalataya ay huwag mapahamak, kundi magkaroon ng buhay na walang hanggan.” Pananampalataya lamang kay Hesus ang hinihingi sa tao upang matanggap natin ang buhay na walang hanggan.

Bibigyan Niya tayo ng kapahingahan sa mabibigat nating pasanin sa buhay kung lalapit tayo sa Kanya. Mateo 11:28-30  “Magsiparito sa akin, kayong lahat na nangapapagal at nangabibigatang lubha, at kayo'y aking papagpapahingahin. Pasanin ninyo ang aking pamatok, at magaral kayo sa akin; sapagka't ako'y maamo at mapagpakumbabang puso: at masusumpungan ninyo ang kapahingahan ng inyong mga kaluluwa. Sapagka't malambot ang aking pamatok, at magaan ang aking pasan.” Ito’y Kanyang panawagan sapagkat nais Niyang ipadama sa atin na hindi Niya tayo pinababayaan at iniiwan. Sadyang tao lamang talaga ang lumalayo sa Dios.  

May pangako Siya sa atin na mapapawi na ang lahat ng ating pagdurusa at wala nang kamatayan. Pahayag 21:4  “At papahirin niya ang bawa't luha sa kanilang mga mata; at hindi na magkakaroon ng kamatayan; hindi na magkakaroon pa ng dalamhati, o ng pananambitan man, o ng hirap pa man: ang mga bagay nang una ay naparam na.”  

Sa kabila ng Kanyang panawagan marami pa rin ang nagmamatigas. Gayunman, patuloy pa rin Siyang nagpapadala ng emisaryo o sugo ng pakikipagkasundo sa Diyos tulad ng mga apostol, mga pastor, mga propeta, mga tagapagturo at mga ebanghelista. Lukas 3:4-6  “Gaya ng nasusulat sa aklat ng salita ng propeta Isaias, Ang tinig ng isang sumisigaw sa ilang, Ihanda ninyo ang daan ng Panginoon, Tuwirin ninyo ang kaniyang mga landas. Lahat ng libis ay tatambakan, At pababain ang bawa't bundok at burol; At ang liko ay matutuwid, At ang mga daang bakobako ay mangapapatag; At makikita ng lahat ng laman ang pagliligtas ng Dios.” 

Nakatakda na ang lupit ng parusa ng Dios na ipapataw Niya sa mga taong ayaw magpasakop at hindi nananalig sa Kanya. Mateo 24:21-22  “Sapagka't kung magkagayo'y magkakaroon ng malaking kapighatian, na ang gayo'y di pa nangyayari buhat sa pasimula ng sanglibutan hanggang ngayon, at ni hindi na mangyayari kailan man. At malibang paikliin ang mga araw na yaon, ay walang lamang makaliligtas: datapuwa't dahil sa mga hirang ay paiikliin ang mga araw na yaon.”

Ito ang Kanyang babala, makinig ang may pandinig! Kung nakakapangilabot ang digmaan ng mga bansa sa bawat mga bansa. Higit na nakakakilabot ang gagawing pakikidigma ng Panginoon Hesus sa dyablo at nang kanyang mga kampon kasama na ang mga taong lumayo at nagmatigas laban sa Dios.

Nakapanghihilakbot na pahayag ng Panginoon na mangyayari sa huling panahon, kaya ngayon pa lang makipagkasundo ka na lang sa Kanya. Simple lang ang dapat mong gawin, isuko mo ang iyong buhay kay Hesus, magsisi ka sa iyong mga kasalanan, tanggapin Siya bilang Panginoon at Tagapagligtas ng iyong buhay. Amen!

Akda ni: Jovit D. Tilo